*جھنگ پولیس نے کم سن بچے کے اندھے قتل کا معمہ حل کر لیا، سگا چچا ہی قاتل نکلا*
جھنگ (شیخ غلام مصطفیٰ ) ضلع جھنگ میں پیش آنے والے کم سن فراز علی کے اندھے قتل کا سراغ جھنگ پولیس نے مختصر ترین وقت میں لگا لیا۔ چھ سالہ فراز علی تھانہ سیٹلائٹ ٹاؤن کی حدود سے لاپتہ ہوا تھا اور بعد ازاں تین روز قبل اس کی نعش فصل کماد سے برآمد ہوئی۔
پولیس کی موثر اور سائنٹیفک انوسٹی گیشن کے نتیجے میں کیس صرف تین روز میں ٹریس کر لیا گیا۔ابتدائی تفتیش میں یہ بات سامنے آئی کہ مقتول بچہ اپنے سگے چچا غلام مصطفی کے ہاتھوں زمین کے تنازعہ پر قتل ہوا۔ ملزم نے بچے کو گلا دبا کر قتل کیا اور نعش کماد کی فصل میں پھینک کر فرار ہو گیا۔
پولیس نے کارروائی کرتے ہوئے ملزم غلام مصطفی عرف ببی کو گرفتار کر لیا ہے۔ڈی پی او بلال افتخار کیانی نے ایس پی انویسٹی گیشن رحمان قادر کی نگرانی میں تشکیل دی گئی انوسٹی گیشن ٹیموں کی کارکردگی کو سراہتے ہوئے ایس ایچ او سیٹلائٹ ٹاؤن شاہد امیر اور ان کی ٹیم کو خصوصی شاباش دی اور سرٹیفکیٹ تقسیم کئے۔
ڈی پی او نے مزید کہا کہ پولیس غمزدہ خاندان کے ساتھ کھڑی ہے اور اس بات کو یقینی بنایا جائے گا کہ قاتل کو قرار واقعی سزا دلائی جائے-
شیخ غلام مصطفیٰ سی ای او و چیف ایڈیٹر جھنگ آن لائن نیوز نیٹ ورک 923417886500 +