پریس ریلیز
سیف سٹی جھنگ: “محفوظ پنجاب” کے ویژن کی تکمیل کی جانب اہم پیش رفت
جھنگ، پاکستان — وزیراعلیٰ پنجاب کے ویژن “محفوظ پنجاب” کے تحت قائم کیا گیا سیف سٹی جھنگ شہریوں کو محفوظ اور پرامن ماحول فراہم کرنے کی جانب ایک اہم قدم ثابت ہو رہا ہے۔ اپریل 2025 میں سیف سٹی جھنگ نے باقاعدہ طور پر اپنے آپریشنز کا آغاز کیا اور صرف 10 ماہ کے مختصر عرصے میں شہر میں جرائم کی شرح میں نمایاں کمی لانے میں کامیابی حاصل کی۔
جدید ٹیکنالوجی، موثر مانیٹرنگ اور پولیس کے فوری رسپانس کے باعث جھنگ میں کرائم ریٹ میں تقریباً 73 فیصد کمی واقع ہوئی ہے۔ یہ کامیابی قانون نافذ کرنے والے اداروں کی محنت اور جدید سیکیورٹی نظام کے موثر استعمال کا واضح ثبوت ہے۔
جدید نگرانی اور فوری ردعمل
سیف سٹی جھنگ میں جدید سیکیورٹی سرویلنس سسٹم کے ذریعے شہر کے اہم مقامات کی مسلسل نگرانی کی جاتی ہے۔ کنٹرول روم میں موجود تربیت یافتہ عملہ چوبیس گھنٹے کیمروں کے ذریعے صورتحال پر نظر رکھتا ہے تاکہ کسی بھی مشکوک سرگرمی یا ہنگامی صورتحال میں فوری کارروائی ممکن بنائی جا سکے۔
ٹریفک مینجمنٹ میں بہتری
سیف سٹی جھنگ شہر میں ٹریفک کے نظام کو بہتر بنانے میں بھی اہم کردار ادا کر رہا ہے۔ جدید کیمروں کے ذریعے ٹریفک کی روانی کو مسلسل مانیٹر کیا جاتا ہے جبکہ ٹریفک قوانین کی خلاف ورزی کرنے والوں کی فوری نشاندہی کی جاتی ہے۔
ای چالان سسٹم کے نفاذ کے بعد شہریوں میں ٹریفک قوانین کی پابندی کے رجحان میں نمایاں اضافہ دیکھنے میں آیا ہے، خصوصاً موٹر سائیکل سواروں میں ہیلمٹ کے استعمال اور گاڑی چلانے والوں میں سیٹ بیلٹ لگانے کی شرح میں واضح بہتری آئی ہے۔
خواتین کے تحفظ کے لیے خصوصی اقدامات
خواتین کے تحفظ اور فوری معاونت کے لیے سیف سٹی جھنگ میں ورچوئل ویمن پولیس اسٹیشن قائم کیا گیا ہے۔ اس پلیٹ فارم کے ذریعے خواتین آسانی سے اپنی شکایات درج کروا سکتی ہیں۔
اب تک 8,337 درخواستیں موصول ہوئیں، جن میں سے 8,101 سے زائد مسائل کامیابی سے حل کیے جا چکے ہیں، جو خواتین کو بروقت مدد فراہم کرنے کے عزم کی عکاسی کرتا ہے۔
چائلڈ سیفٹی اور گمشدہ افراد کی بازیابی
ورچوئل سینٹر فار چائلڈ سیفٹی کو 460 گمشدہ بچوں اور بڑوں کی اطلاعات موصول ہوئیں، جن میں سے 453 افراد کو بحفاظت ان کے اہل خانہ سے ملا دیا گیا۔
پینک بٹن سسٹم
شہریوں کو ہنگامی صورتحال میں فوری مدد فراہم کرنے کے لیے پینک بٹن سسٹم بھی متعارف کرایا گیا ہے، جس کے ذریعے صرف ایک بٹن دبانے پر متعلقہ اداروں سے فوری مدد حاصل کی جا سکتی ہے۔
ورچوئل بلڈ بینک
سیف سٹی جھنگ کے ورچوئل بلڈ بینک کو اب تک 605 درخواستیں موصول ہوئیں، جن میں سے 604 افراد کو خون فراہم کر کے ان کے مسائل حل کیے گئے۔
اس کے علاوہ 4,793 ڈونرز بھی اس سسٹم میں رجسٹر ہو چکے ہیں، جو ضرورت کے وقت شہریوں کی مدد کے لیے دستیاب ہیں۔
جرائم کی تفتیش میں معاونت
سیف سٹی جھنگ نے 148 کیسز میں پولیس کو اہم شواہد فراہم کیے، جن میں سے 75 کیسز پر پولیس نے کامیاب کارروائی کی۔
مزید برآں سیف سٹی کے کیمروں کی مدد سے ڈکیتی، موٹر سائیکل چوری اور دیگر سنگین نوعیت کی 243 وارداتوں کو ٹریس کیا گیا، جس سے پولیس کو ملزمان تک پہنچنے اور جرائم پر قابو پانے میں نمایاں مدد ملی۔
آگاہی اور تعلیمی دورے
شہری آگاہی کو فروغ دینے کے لیے سیف سٹی جھنگ کی ٹیم نے مختلف اسکولوں اور کالجوں کے دورے کیے۔ طلبہ کو سیف سٹی کی سہولیات، جدید سیکیورٹی نظام اور شہری ذمہ داریوں کے بارے میں آگاہ کیا گیا۔ اس کے علاوہ طلبہ کو کنٹرول روم کے دورے کے ذریعے عملی طور پر سیکیورٹی مانیٹرنگ کے نظام سے بھی متعارف کروایا گیا۔
محفوظ شہر کی جانب ایک مضبوط قدم
سیف سٹی جھنگ جدید ٹیکنالوجی اور موثر حکمت عملی کے ذریعے شہر میں نگرانی کے نظام کو مزید مضبوط بنا رہا ہے۔ اس نظام کی بدولت شہری خود کو پہلے سے زیادہ محفوظ محسوس کر رہے ہیں اور قانون نافذ کرنے والے اداروں کی کارکردگی میں بھی نمایاں بہتری آئی ہے۔
شیخ غلام مصطفیٰ سی ای او و چیف ایڈیٹر جھنگ آن لائن نیوز نیٹ ورک 923417886500 +